Barot Isroil (1938)

DO`STLARGA ULASHING:

Barot Isroil 1938 yilda Toshkent viloyatining Oʻrta Chirchiq (hozirgi Ohangaron) tumaniga qarashli Toshsoy qishlogʻida, dehqon oilasida dunyoga keldi. 1953 yilda Toshkent poligrafiya texnikumida matbaachi ixtisosini egallab, 1956 yildan Toshkent shahridagi 1-sonli bosmaxonada ish faoliyatini boshlaydi. Ayni shu yillari “Imtihon” sheʼrini yozib, oʻzi yashagan tumanning “Mashʼal” gazetasida eʼlon qildiradi.

Isroil Toshkent davlat pedagogika institutida (1960–1966) tahsil olgach, hozirgi “Tong yulduzi” gazetasida (1966–1970), soʻngra Oʻzbekiston teleradiokompaniyasida xizmat qiladi.

Shoirning ilk “Boychechak” kitobi Oʻzbekiston xalq shoiri Mirtemirning soʻzboshisi va muharrirligida nashr etiladi (1972). Shundan soʻng “Nay navosi” (1976), “Oq bulut” (1979), “Oq oltin” (1980), “Bahor” (1982), “Subhidam” (1985), “Shirin kulcha” (1989), “Nastarin” (1992), “Toʻytepaga toʻyga keling” (1997), “Alisherning shirin tili” (1998) singari majmualari hamda Najmiddin Kubro toʻgʻrisidagi “Turonlik avliyo” asari dunyoga keldi.

Bolalar uchun yozilgan “Er va sheʼr” dostoni asosida “Hayvonlar sultoni” nomli opera, “Alisherning shirin tili” dostoni asosida radioinssenirovka yaratildi. Besh jildlik tanlangan asarlari chop etildi

Barot Isroil X. Xatak, N. Nekrasov, T. Moʻlda, S. Muqonov, R. Hamzatov, J. Oymirzayev singari qardosh xalqlar shoirlari ijodidan tarjimalar qildi.

Barot Isroil “Shuhrat” medali bilan taqdirlangan.

“Oʻzbek adiblari” (S. Mirvaliyev, R. Shokirova. Toshkent, Gʻafur Gʻulom nomidagi adabiyot va sanʼat nashriyoti, 2016) kitobidan.