Tinch bo‘lsin osmonimiz (bolalar uchun sher)

DO`STLARGA ULASHING:

Tinch bo‘lsin osmonimiz

O‘rtahol po‘rtaxol

Yetti iqlimdan kelgan

Mevalar navi har xil.

Ular biri biridan

Shirin, chiroyli, sarxil.

 

Go‘yo yovvoyi “ekin”

Banan, kokos, ananas…

Tekin emas-u lekin

Hamma qiladi havas.

 

Apelsin, funduk, xurmo,

Kivi, limon, mandarin…

Bizga sal “o‘gay”, ammo

Yaxshi ko‘ramiz barin.

 

Barchasini ko‘ring teng,

O‘poq, so‘poq, yumaloq…

Shiming, so‘ring, iching, yeng,

Uvol qilish yo‘q, biroq!

 

So‘radim nevaramdan,

Ya’ni berdim bir savol:

– Sanalgan mevalarning

Qaysi biri po‘rtaxol?

 

 

Daraxtlar

Goh yakka, goho to‘p-to‘p…

Daraxtlarning turi ko‘p.

 

Bog‘lar yaratar bog‘bon,

Chayqalar qadim o‘rmon.

 

Mevalimi, mevasiz,

Barini teng sevasiz.

 

Chunki har adl daraxt

Bolalarga tilar baxt!

 

 

Tabiat

Tabiatman, ona tabiat,

To‘rt unsurning doyasi o‘zim.

Quyosh porlar – bu tonggi niyat,

Buloq bo‘lib ochilar ko‘zim.

 

Suv va Tuproq – hayot asosi,

Olov, Havo – bari menda jo.

Hech birining yo‘qdir qiyosi,

Biroq bari aylar iltijo.

 

Ya’ni ular tilar omonlik

Har giyohga, har jonivorga.

Ko‘rmasin-ey olam yomonlik,

Achchiq ko‘zyosh tommasin qorga.

 

Dillaringiz quvonchga to‘lsin,

Odam baxti bo‘lmasin yarim.

Butun dunyo munavvar bo‘lsin,

Tabiatni asrang, do‘stlarim!

 

 

Suv

Suv poklik, suv tozalik asli,

Anglar buni har odam nasli.

Shuni bilib qo‘ygil, birodar,

Bir qultum suv zarga barobar.

O‘zbek, qozoq, tojik, turkmanlar.

– Suv keltirgan aziz! – deganlar.

Suv talashib kechmish ne janglar,

Suvni asrang, suvni tejanglar.

 

 

Quyosh

Men quyoshman, quyoshman,

Hamisha sizdek yoshman.

 

Zarrin nurlar sochaman,

Hosilga yo‘l ochaman.

 

Tinch bo‘lsin osmonimiz,

Tolmasin posbonimiz.

 

Meni qutlagay har on

Serquyosh O‘zbekiston!

 

Yahyo Tog‘a,

60 yosh

manba:gulxan.uz

Оставьте комментарий

ArabicChinese (Traditional)EnglishFrenchGermanHindiKazakhKyrgyzRussianSpanishTajikTurkishUkrainianUzbek